ភ្នំពេញ៖ ប្រទេសប្រជាធិបតេយ្យលើពិភពលោក គេប្រយ័ត្នខ្លាំងណាស់ចំពោះការលូកដៃពីបរទេសនៅក្នុងនយោបាយផ្ទៃក្នុងរបស់ខ្លួន។ បើនិយាយពីលោកស្រី មួរ សុខហួរ វិញ គាត់ក៍បានសរសេរអត្ថបទតាមបែបស្រមើស្រមៃ រវើរវាយនៅថ្ងៃទី១១ ខែសីហា ដើម្បីវាយប្រហារលើ «តេជោហ៊ុន សែន និងបណ្ឌិត ហ៊ុន ម៉ាណែត»។
គ្រាន់តែអានចំណងជើងនៃអត្ថបទ យើងក៍ហួសចិត្តបាត់ទៅហើយ។ ហួសចិត្តទីមួយ គឺការបន្តខិតខំ ពន្លិចនាវាកម្ពុជានៅលើឆាកអន្តរជាតិរបស់គាត់ ។ ហួសចិត្តទីពីរគឺគាត់លែងមានមនុស្សឈ្លោះជាមួយ បែរជាមកឈ្លោះជាមួយយុវជនជំនាន់ក្រោយដែលមានអាយុប្រហែលនឹងកូនគាត់ទៅវិញ។
យ៉ាងណាក្តី ខ្មែរយើងមានវប្បធម៌ផូរផង់និងថ្លៃថ្នូរដែលបង្រៀនឱ្យយុវជនគោរពចាស់ទុំដែលគួរឱ្យគោរព។ ហើយបើចាស់ទុំនោះមិនមែនជាមនុស្សគួរឱ្យគោរព យើងក៏មិនទៅតបតអ្វីនឹងគាត់ដែរ។
គ្រាន់តែឧទាហរណ៍ពីរបីខាងលើនេះក៍អាចបញ្ជាក់រួចទៅហើយថា ក្រុមប្រឆាំងបានដើរយឺតជាងដំណើរជាក់ស្តែងនៃនាវាកម្ពុជា។ នាវាកម្ពុជាបានចាប់ផ្តើមដូរមុខមាត់ថ្មីអស់ហើយ ប៉ុន្តែ ក្រុមប្រឆាំងនិងវិទ្យុរបស់ក្រុមប្រឆាំងនៅតែជាមនុស្សដដែលៗ ដែលចង់អោយតែប្រទេសជាតិ បែកបាក់ គ្មានស្ថិរភាព។
នៅក្នុងខ្លួនរបស់ជនអគតិមួយក្តាប់តូចនេះពុំមានឡើយនូវចិត្តបុណ្យ មេត្តា ករុណា គ្មានធម៌ គិតតែហែកហួរ ចងអាពាធព្យាបាទនិងបង្កគំនុំហិង្សាផ្លូវចិត្ត។ ពួកគេបានកាន់លិខិតឆ្លងដែនបរទេស ភ្លេចអស់ហើយកិត្តិយសជាខ្មែរ មកជាន់ពន្លិចតែជាតិសាសន៍ និងប្រជាជនឯង។
នាវាកម្ពុជាលើកនេះកាន់តែរឹងមាំណាស់។ យើងមាន «កាពីទែនថ្មី ខ្លាំង ក្លៀវក្លា» ហើយ «អតីតកាពីទែន ក៏នៅបន្តឈរពីក្រោយផ្តល់ដំបូន្មាន ក្នុងការកាច់ចង្កូតនាវាកម្ពុជាផងដែរ»។ នាវាកម្ពុជានឹងបន្តដំណើរដ៏រឹងមាំរបស់ខ្លួនពីបង្គោលចរ «តេជោសន្តិភាព» ឆ្ពោះទៅរកបង្គោលចរ ថ្មីនិងរុងរឿងថែមទៀតនៃសុបិនកម្ពុជា ឆ្នាំ២០៥០។
ជយោព្រះរាជាណាចក្រកម្ពុជា!!
